Демократска Десница е против било каква промена на името

Партијата Демократска Десница испрати соопштение во врска со спорот за името.

Во продолжение следува интегрален текст од соопштението

Во врска со признанието на владеачката гарнитура дека на самитот на НАТО во Букурешт е прифатена промена на уставното име на републиката во Република Македонија (Скопје), Демократска Десница потсетува дека власта по тој повод го подели населението на патриоти и предавници, се наведува со соопштението.

Настаните во Букурешт потоа беа злоупотребени за Македонија да се оддалечи од НАТО и ЕУ интеграциите, со што се загубија 3 драгоцени години, за сега да се признае дека сето тоа било смислена манипулација со јавното мислење.

Демократска Десница е против било каква промена на уставното име и ја повикуваме власта да ги разоткрие сите детали за тоа што е преговарано и какви други отстапки се направени. Граѓаните имаат право да знаат што се прави во нивно име, се истакнува во соопштението.